Sorkar lai hian sum an va dap nasa ve a. Tlin a tum tawh lo em mi le? Ni tina inhlawh chawp leh sum lak luhna nei tan lo chuan Congress hi bansan mai chi a ni ta. Rethei tan tel vena chi a ni lo tawp mai a.
No thup
—————-
Kan khua, Mualcheng-ah hian Footballer pahnih kan nei ve a, Sena Ralte leh Liandala te hi an ni. Khaw dangah hian Aizawl tih loh footballer pahnih nei an awm ve em le? Kan khua Footballer pahnihte hi kan chhuang ve khawp asin.
Mavana K, Mualcheng
——————–
Rualkhuma Hmar hi mi fing, lehkhathiam tak niin ka lo hria a, kum 2018 inthlanah Congress thlak turin mipuiin MNF an beisei a ti hi duhthusam pawh ni se a awm lo deuh. Duh duh herh chhuahna tih ang vel a ni. Ram than tithu vek khawpa corrupt kha thlang duh an tlem tawh hle ang.
VL Ruata
—————-
Saptawng thiamte khàn min han hrilhfiah teh u, kei saptawng thiam ve lo hi. Chanchinthara Rody chungchang an puan reng rengin Miss India Mizoram an ti zèl a, kei mimàwl chuan Miss India niin pakhatna emaw ka lo ti hman a. Pakhatna a nih si loh chuan Miss India Mizoram tia puan fo hi a dik tho em mi? Ka duh fir vang nge, Miss India Contestant, Mizoram tih ni se a dik zawk ang em?
DIKI PA
———–
Chanchin thara Pu Hawla’n, tun hnaia kan buainaa ruihhlo ngaite camping centre-a thawkten cheng khat mah hlawh nei lo a thawk an ni a, tia a sawi kha, sorkar hian a ngaihthahzia leh CM meuhin a chhawmdawlna lam sawi awm si lo-a mipuite laka thiam chan tumna ang ringawt leh hmasawnna tur pakhatmah awm chuang si lo a sawi hi, mahni mawnghlim mai a ni tih a inhre lo em ni aw? A thenah sum harsat thu sawi leh a then hlawh mumal lak tur nei lote an awm laia NLUP-ah sum tam tak a sem leh thei zel mai si te, khaw hmu lek lo-a NLUP a thlur bing vak ringawt maite hi, ram hmangaihtu thil tih a ni thei dawn em ni?
Tlabung Uitangrual
——————-
Tuikual Veng Indoor Stadium-ah hian chhun zan zawmin an au dur dur reng mai a. |halai, a bikin zirlaite hian an thatpui ang nge an chhiatpui ang tih hi ngaihtuah tham tak a ni.
9436143264
—————
Chakma-te hi mawhchhiat ngawt suh. Mipuite leh politician mawh theuh ang u. In chhungah ar duh zawng buhfai i dah lang reng a, in neituin kawngka i hawng huau a, i muhil bawk si a, ar chuan a duhzawng chu a ei mai ang chu, chutiang chiah chu kan ni lo maw?
Tlabung aw
———–
Dawt sawi hmang hruaitu neih hi a vanduaithlak takzet a ni. ‘A sawi leh tur pawh dawt bawk’ tih ang chi hi zawng i hnawl tawh ang u, kan chhiat phah zel dawn e!
Thlirtu
—————
Pastor Chhawna inlarnaah chuan, ‘Kan ram lai takah hian thlalatuin thla a lo la a, khawchhak leh khawthlang leh chhim leh hmar thla a la a. A reh ta vung mai a. A chhia nge a tha hre loin kan lo nghak thuap mai a. Khawchhak diarkhim leh khawthlang diarkhim hnuaiah kan ram chu a lo kun dawn ta ngei mai a. Chu mite chuan hmel fel liah pu-in min lo tal chhuahpui a’ a ti a. Tun laia Korea leh USA-te hi an ni thei ang em? Nge, CHINA leh INDIA inngur reng hi le?
Dindini pu
————-
Fakselna hi mipui tam zawk chuan kan tangkaipui hlein ka ring. Chuvang chuan thu tha deuh deuh kha rawn thawn zel teh u. Kan ngaimawh zawng te, tha kan tih zawng te. Kan thawn min lo puan chhuahsaktu leh kan thu thawn sual pawh min lo siam remsak zeltu Fakselna vul zel rawh se.
No thup
———-
Fakselna-a MNF ten hnam pasalthate ruhro pawh zah lo anga rawn sawitu khan, ruhro chungchanga hma lak tumna i neih ve sawi leh hriat awm si lo-a MNF te hma lakna sawi chhiat leh fam ta te ruhro, hetiang leka i ngai hi chu hnam tan pawh mualphona thlen theitu a ni mai lovang maw? Keini chuan kum 1 emaw, kum 30 dan a mi pawh ni se kan hlut dan leh kan ngaihsan dan a ngai reng. MNF hian an ^k tha emaw, an thulkhung emaw, a eng huna pawh chu lo ni se, ka Ui, ka Ar a ni titu dang an awm chuan kan hre lo tlat. Leilunga luan raltir mai mai hi kan thil tum a ni ve lo a ni tih i lo hriat kan duh takzet a ni.
8729959565
————–
Sorkar-in Aizawl Hospital leh Care Hospital-te chu MR bill theihna a tihtawpsak si chuan, keini sorkar hnathawkte chu heng hospital pahnihah hi chuan kan va in-admit ngam tawh awm lo ve. MR bill duh vek kan ni awm si a.
Sanga pa
———–
Tukin Vanglaini headline-ah, CM thusawi, ‘Kut tling lova sum lak luh chingte kan huat a hun tawh’ tih thu a chuang a, ngaihtuahna a va ti tam em! A lo la haw ngai lo tihna a ni thei em? Tute nge haw tura a sawm? Amah hi hetiang mi hre bertu tur a ni a, a hrem theitu pawh a ni. Mi dang hian lo haw tehreng pawh ni ila engtinnge maw kan tih ang le? Thu chuan a hua a, a tak erawh chuan a haw lo an tih ang vel hi kan ni mai em?
RK Sanga
————
Vanglaini (11.08.’17) chhuaka Thingsiri par tia a thlalak rawn lang hi a dik maw? Ni-a ka lo hriat ve nen a inang hauh lo mai. Han tihlan ve mai tur erawh ka nei azeng a ni hlei law.
Ronald VLC
—————-
Keini, Chhingchhip DCSO hnuai atanga ration late hi engtizia bik em em nge maw ni thin le? Thla thar thla chanve dawn hma loh chuan ration buhfai hi kan lak ve theih ngai reng reng loh mai le? An lei chhiate pawh kha siam tha viau tawh khan an insawi tawhin ka hre si a. Keini ang ei chawp dap tan chuan a manganthlak duh khawp mai. Buhfai tha vak lo kg 1, Rs. 40 dawn dawnin kan lei reng mai a tul fo hi chu. Eng party sorkar mah atanga duhsakna dawng ve phak ngai lo keini ang tan chuan hrehawm tak a ni. An kalphung thara ration lak dan thar an tih lah hi kan kham lo hlawm ropui si. Khawnge an buhfai chhek khawl zozai, an sawi chhente pawh chu an dah a? Tu ei atan nge an tih?
Thinrima
———–
