Thuchhuah an siamah MPCC hian, Covid 19 hri leng vanga chhungkaw tam tak takin harsatna an tawh mek laiin Sorkar chuan
kumin April ni 1 atang khan kawlphetha hman man a tisang tih sawiin, pawi an tih thu an sawi. MPCC hian, Kawlphetha hman man tih san a nih rual hian Bill dik lo vangin chhungkaw tam takin an chawi tur aia tam an chawi phah a, In leh lo nei lo khawsak harsa zawkte chenna tura din, Lawipu-a BSUP a cheng zinga chhungkaw engemawzat chuan electric bill-ah hian cheng sing chuang an dawng hlawm a. Hei hi an tan phurrit a tlin avangin Department-ah ennawn sak turin an ngen tih an sawi.
Dik lo taka kawhphetha hman man tih san a nih hnuah State chhunga sum dehchhuah chu nasa takin a pun phah niin Congress Party hian an sawi a, kum 2019 April leh May-a sum lakluh aiin kumin April leh May thla sum lakluh chu cheng vbch. 17 zetin a tam zawk a ni, an ti a. Sum thawhchhuahna tur kawng dang rek si lovin, sorkar chu kawlphetha hman man hmanga mipui rawk-ah an puh a. Covid-19 vanga mipui phur rit chu belh chhah lo turin Sorkar an ngen tih an sawi.
