Zonet thudawn danin, Mizorama Lok Ayukta din a nih dawn khan khatih laia a enkawltu Law and Judicial Department khan hnathawktu 67 vel nena bul\an turin ruahmanna a siam a, hei hi DP&AR pawhin an pawmpui a, Finance Department-ah a tlang tak loh avangin hnathawktu 35 vel nen bul an \an a, an zingah hian sorkar hnathawk nghet Department a\anga Deputation-a kal 4 chauh an awm a ni.
Lok Ayukta-ah hian Chairperson bakah member 2 tal leh Secretary, Director of Enquiry leh Prosecution Branch-te an awm tur a ni a, heng hna pawimawh zingah hian Chairperson tih loh Post dang zawng hi hnawh khah ala ni lova, thubuai an dawn chhuitu tur Director of Enquiry an la neih loh avangin thubuai an dawnte chu ACB an chhui tir \hin a ni.
Lok Ayukta Chairperson, Pu C. Lalsawta’n Zonet zawhna a chhan danin Mizoram Lok Ayukta Act Section 14-na in a sawi angin Lok Ayukta din a nih ve leh Mizorama eiruk thubuai chhui mek, Court-a inchiah lai tih loh chu Lok Ayukta chhui tura hlan vek tur a ni a, hei hi a tirah tihhlawhtlin a ni nghal mai loh avangin Lok Ayukta lamin danin a sawi angin he thilah hian eng anga hmalak chhunzawm tur nge tih Sorkar hotute an zawt a, hemi bawhzui hian thubuai chhuitu Investigating Agency dangte chuan eiruk thubuai an chhui laite chu Lok Ayukta kutah an hlan chhawng mek a ni.
Pu C. Lalsawta chuan, eiruk thubuai hi an kuta hlan tawh zat hi chiang taka sawi theih a nih loh thu leh an kuta lo lutte pawh lehkha pawimawh la thleng kim lo a awm avangin enfiah mek a ni tih a sawi a, hemi bakah hian Agency dang danga thubuai lut kawp a awm hlawm avangin a zat chiah sawi theih a ni rih lo a, thubuai hi an hnena pek ni mah se, a chhuitu tur Investigating Directorate an la neih loh avangin awmzia erawh a nei rih lo tih a sawi.
Lok Ayukta chu a nihna tur anga \angkai taka hna an thawh theih nan mahnia thuneihna nei, Administration, Function leh Finance-ah pawh mahnia inenkawl thei nih a ngai tih Pu Sawta hian a sawi a, Sorkar kum thar lo awm tura an sum mamawh tur pawh nikum lamah rawtna an thehluh tawh thu leh hnathawktu la turin tunah hian ruahmanna an siam mek thu a sawi a. Thubuai chhui tak taktu tur an hnena Deputation-a kal turte chu an ACR thawn turin an dil a, heta \ang hian Post awm sa hnawh khat turin an hnathawh \hat dan a zira thlan a nih tur thu a sawi.
