A Ukil sawi danin Morsi hi tukin khan Eastern Cairo-ah a chhungten an vui liam a ni. Morsi fapa, Abdullah Mohammed Morsi-an Reuters a hrilh danin Thawh\annia a pa ruang vantlang huapa vui an dil chu Egyp ram thuneitute chuan an remti lo a ni.
Human rights groups chuan Morsi-a chunga rorel dan chu a dik tawk lo nia sawiin, a thih dan chu hleih nei lova chhui chiang turin thuneitute an ngen a, hetihlai hian a chhungte leh amah \antute pawhin Morsi chu a hriselna dinhmun te, amah chauha an tan tira, khuahkhirh a nih dan leh a chhungte leh a Ukil ngei pawhin an tlawh pawh theih loha dah a ni te chu ngaih\hat thlak loh an tih thu an sawi bawk.
Kum 67 mi Mohammed Morsi hi Palestinian hel pawl, Islamist group Hamas te nen ram inenthlakna chungchangah inberua puh a ni a, kum 2013 khan a hna a\anga banin lung inah khung a ni a, a thubuai chungchangah hian Cairo Court-ah a inlan a, minute 5 vel thu a sawi zawh hnuah a chau thut a, damdawi inah hruai nghal nimahse a thi tih puan zui nghal a ni.
Sorkar hotute chuan a thih danah thil fel lo a awm em tih enfiah turin mithiam an tir nghal a, a taksaah pem thar engmah hmuh tur a awm lo niin an sawi. Morsi hi kum 10 chuang lung in-a a tan tawh hnuah tun hnai khan tihhlum tura a chungthu rel leh a ni a, hei hi hnuhlet leh a ni thung.
