Tuivawl bialtu, Pu Lalchhandama Ralte hian ramria duty te hnenah hian nitin mamawh chi hrang hrang leh damdawi, silpauline leh tangkafai tanpuina a pe a, hripui leng mek do kawnga sorkar hmalaknaah duhthusam thleng thei lo mahse ram leh hnam himna turin theihtawp chhuah zel a ni a ti a, hripui lengin ram leh khawtlang nunah inhmangaihna leh induhsak tawnna thlen zel se a duh tih a sawi a, intodelh tura tanla turin chhungkaw tinte a chah a ni.
Mizoram leh Manipur inrina, Tuivai kam, New Vervek kaiah hian thla khat chuang zet hri leng laka himna turin mi tlawmngaite zan riakin an duty tawh a, hmun hnihah duty-na hmun siamin hmun khatah an riak a; an duty-na bul, lui kamah Manipur atanga lo lutte quarantine-na hmun tur an buatsaih bawk.
Tun dinhmunah New Vervek bakah Lungsum leh Damdiai atangin mi tlawmngaiten an duty-pui a, Vaitin khua leh Khawpuar inkar Tuiruang lui kamah Sakawrdai YMA branch pathum – Hmar Veng, Vengpui leh Chhimveng te chu zan riakin kar khat dan zelah a inchhawkin ngawrh takin an duty bawk a ni.
