Dr Ram Manohar Lohia Hospital-a SNCU-ah thla khat chhungin nau piang hlim 49 thi

Uttar Pradesh-a Farrukhabad khawpuia sorkar damdawi in, Dr Ram Manohar Lohia Hospital-a nau piang hlim dinhmun tha lo zualte awmna, Special Newborn Care Unit-ah thla khat liam ta chhung khan nau piang hlim 49 an thi a, he vanduaina hi oxygen tlakchham avanga thleng nia sawi a ni. Hemi chungchang hi Farrukhabad Bawrhsap, Ravindra Kumar-a’n he damdawi in a tlawh hnu, thla hlui ni 30-a damdawi in endikna tur thupek a chhuah hnuah hriat chhuah a ni a, Bawrhsapin damdawi in a tlawh hma khan tualchhung media thenkhat chuan SNCU ward-ah hian darkar 14 danah nausen pakhat zel an thi niin a lo sawi tawh a ni. Farrukhabad SP, Daya Nand Misra sawi danin, Pathianni tlai khan RML damdawi ina Chief Medical Officer, Uma Kand Pandey leh Chief Medical Superintendent, BP Pushkar leh doctor engemaw zat lakah FIR an thehlut a, damdawi in hotute hian police-te thudik lo an hrilh nia hriat a ni a, Bawrhsap hnena report an thehluhah oxygen bur indaih lohna avangin nausen 49 an thi tih an ziak a ni. Farrukhabad damdawi ina vanduaina thleng chungchangah hian state sorkar chuan thuchhuah siamin, SNCU-a nausen thi 49 zinga 19 hi chu thi saa piang niin a chhal a, an thih chhan tak chhui chiang turin Lucknow atangin mi thiamte tirh an ni dawn nia sawi a ni a, vawiin khan Lucknow-a sorkar thupuangtu chuan July ni 20 atanga August ni 21 inkar chhung khan nausen ICU-a thi 30 leh thi saa piang 19 an awm niin a sawi a ni. Uttar Pradesh sorkar chuan vawiin khan Farrukhabad district Bawrhsap, Ravindra Kumar, Chief Medical Officer leh Chief Medical Superintendent hi a sawn nghal a ni.