Minister of State bang ta, Dr. BD Chakma-a’n NEET hmanga Mizoram Quota-a MBBS leh BDS zir tur thlannaa Chakma zirlai paih an nih chungchangah Higher and Technical Education Minister, Pu R. Romawia thutlukna chu a dem thu a sawi a. Vawiina Tuikhuahtlanga a chenna in-a thuthar lakhawmtu thenkhatin an kawmnaah Dr. BD Chakma chuan, The Mizoram (Selection of Candidates for Higher Technical Courses) Rules, 2016 chu Court-in hmang rih lo tura Mizoram sorkar a hriattir chunga Category-I atanga Chakma zirlaite paih an ni leh, MBBS leh BDS zir thei lo tura hnawl an ni chu a tan pawm theih a ni lo tih sawiin, he thutlukna siamtu H&TE Minister, Pu R. Romawia chu a dem thu a sawi a, hei hi a banna a thehluhah pawh a ziak lang tih a sawi. Dr BD Chakma chuan, Mizoram Quota-a MBBS leh BDS zir turte tana vawiina Higher and Techincal Education Department, Technical Wing-in Counselling a buatsaihah pawh Chakma zirlaite hian nilengin koh an nih hun an nghak a, koh an nih tak loh avangin rilru na takin an awm niin a sawi a, Chakma zirlaite hian eng vangin nge ram leilung fa chanvo chu an chan loh ang tih chu a ngaihdan a nih thu leh, he chanvo hi Chakma zirlaiten an chang ngei tur nia a ngaih thu a sawi bawk. Chakma zingah dan kalha Bangladesh atanga lo lut an awm thin nia sawi chungchangah Dr. BD Chakma chuan, mi thenkhat sawi anga dan lova Bangladesh atanga lo pem lut an awm a rin loh thu a sawi a. Danin a phut angin India rama cheng turin lehkha pawimawh an neih a ngai a, Electoral Roll-a chuang tur phei chuan dilna thehluh hnuah anmahni finfiah leh phawt loh chuan Electoral Roll-ah chuan theih a ni lova, hetiang zawng zawng buaipuitu Officer-te chu Mizo vek an nih avangin, dan lova Bangladesh atanga lo lut, lehkha pawimawh nei lo tan, India khua leh tui anga inziah luh chu thil theih nia a ngaih loh thu sawiin, amah ngei pawh Bangladesh atanga lo pem lut anga mi thenkhatin an sawi chu politics-a a hlawhtlinna an itsik vang nia a ngaih thu a sawi a ni.
Dr. BD Chakma chuan, Council of Ministers atanga banna a thehluh chhan chu NGO Coordination Committee nawrna vang a nih loh thu leh, bang tur hian an Party hotuten thurawn an pek loh thu a sawi a. He thil hi a chhia leh tha hriatna hmanga thutlukna a siam liau liau nia sawiin, Minister atanga a ban avangin Congress Party a chhuahsan dawn tihna a nih loh thu leh, tun ah pawh hian Congress Party mi rinawm tak a nih thu a sawi a ni.
