Trump-a eptu lam party, Democratic hotute chuan sorkar department khar te chu hawn an nih hma chuan Mexico nena an ramri hung chungchang sawiho an remtih loh thu an sawi avangin thupek hi siam a ni a, thupek hian ramri chungchanga sum hman dan tur ngaihtuahtu tur, House leh Senate a dan siamtute awm khawmna committee din turin a tih bakah, sorkar khar a nih chhunga hlawh la lo mi 800,000 te chu a rang thei ang bera hlawh pek an ni dawn bawk a ni. Puan tawh angin US Sorkar-a Department ta zawk chu ni 35 zet khar a ni tawh a, an sum mamawhte pek chhuah a nih loh avangin hnathawk hlawh la lo pawh an tam hle a, US Sorkar-in hna a thawh mumal theih loh vang hian mipuite pawhin harsatna an tawk nasa hle a, hnathawk indaih lohna avangin \umhmun \henkhat chu khar a ni a, khar lo te pawhin thlawhna thlawk chhuak tur an tikhawtlai nasa tawh hle a, Trump-a hnuaia thawkte pawhin sorkar department te chu hawn thuai a nih theihnan an nawr nasa ve hle a ni.
Trump chuan Congress hotute nena inrem rih angin lang mahse, Mexico nena an ramri hungna bang siam a tum chu tihhlawhtlin a la tum tho thu leh a sum mamawh pawh a hmuh ngei theih nan sorkar thuneitute pawh hmin ngei a la tum thu a sawi bawk a, a hlawhtling lo anih chuan a thuneihna hmanga emergency a puan loh pawhin sorkar department te hi thla thar ni 15 khian khar leh a tum thu a sawi bawk a ni. Hetih lai hian Democrat hotute chuan bang sak hi thlawp an tum loh thu an sawi ve bawk a ni.
