PRISM President, Pu Vanlalruata’n tuna Mizoram dinhmun thlirin District dang siam belh tawh rih loh chu tha berah an ngai tih vawiina an pawl bengvar inkhawmah a sawi a. Nakkumah Mizoramin Assembly inthlanpui a hmachhawn dawn avangin vote zawnna atan tu hnenah mah District thar pe lo tur leh inthlan chuh tumte pawh vote zawn nana District thar tiam lo turin pawl tin an ngen tih a sawi. Pu Vanlalruata chuan, hun kal tawhah vote zawn nana District thar puan a nih avangin buaina tam tak a thleng a, thisen hial a chhuak tih sawiin, hetiang hi thlen nawn tawh lo se an duh thu a sawi a ni. Prism President chuan, thuneihna an chan chuan tuna District awm sa hi ennawn a, ramri pawh siam that vek a nih tur thu leh thuneihna sem zaiin, Municipal leh Village Council chu thuneihna sang zawk pek a nih tur thu a sawi bawk. Vawiina Prism bengvar inkhawm hi an pawl General Secretary, Pu RL. Liantluanga’n a kaihruai a, Jt. Secretary, Pu Lalthuamliana’n an pawl hnathawh dan a sawi bawk.
