He thubuai Sorkar aiawha ding Public Prosecutor, Pu R. Lalremruata hnen a\anga Zonet thudawn danin, Pu Rodney Lalrinawma Ralte hian Mamit Bawrhsap a nih lai kum 2010 bawr chhoah khan Dampa Tiger Reserve-in a huam chhunga Andermanik khaw sawn chhuah nan National Tiger Coservation Authority a\angin Rs. nuai 2,770 dawn a ni a. He sum hi dik lo taka hman nia sawi a nih avangin khatih laia Chief Secretary chuan Vigilance Department hnenah he thil hi chhui turin a ti a, hemi ang hian Anti Corruption Bureau (ACB) chuan he sum chingpen nia sawi hi a chhui chiang ta a ni. ACB-in an chhuina a\anga a lan danin, he sum hman a nih danah hian thil fel tawk lo a awm ngei nia hriat a ni a, Andermanik khaw sawnna atana sum hmanna bakah Dampa Tiger Reserved huam chhunga khaw awmte sawn dan tur leh an khawtlang tana hmalak dan tur ngaihtuah a nihnaa khawtlang hruaitute sitting allowance pek an ni ngai lo nia hriat a ni a. Hei bakah hian zun in leh hmasawnna hna hrang hrang thawhnaah pawh khawtlangin an dawn tur zat pe kim lovin khawtlang hruaitute chu lehkha ruakah an sum dawnna hming ziah tir an ni a, hetah hian thuneitute chuan sum tam tak an hlep ru ngei nia hriat a ni bawk a. Heng puh a nihna hrang hrangah hian thubuai ngaihtuahtu Court of Special Judge (Prevention of Corruption Act) Special Judge, Pu Thang Lianmang Guite Court chuan ACB-in a thil chhuina Report a thehluh leh thuhretute thusawi a ngaihthlak a\angin Pu Rodney Lalrinawma Ralte chu thiam loh a chantir a, hrehawm taka kum 3 chhung tang tur leh Rs. nuai 5 chawi turin a ti a. A pawisa chawi tur hi a pe thei lo a nih chuan kum 1 dang a tang belh a ngai dawn a ni.
Hetihrual hian Court chuan, Pu Rodney Lalrinawma Ralte chu a laka Court thurem danah a lungawi lo a nih chuan Court sang zawka a zualko theih thu a sawi a. High Court-a a zualko theih nan thla khat chhung hun pein, hetih chhung hian Pu Rodney Lalrinawma Ralte chu Bail-a chhuah lailawk a remtih sak a. Thla khat chhunga High Court-a a zualkona lehkhate Court-a a thehlut hman lo a nih erawh chuan man leh nghal a ni dawn a ni.
