Rannung seh natna tun hnaia a lenna Haulawng khaw tlawha tun thla ni 8 atanga a hmuna thil awmdan zirchiangtu, National Centre for Disease Control (NCDC) Additional Director, Dr. AK Bansal leh midang panga te leh Integrated Disease Surveillance Programme State Nodal Officer, Dr. Pachuau Lalmalsawma te huaihawtin vawiin khan Disease Surveillance Officers te tan training Health Directorate Conference Hall-ah neih a ni. He training-ah hian National Centre for Disease Control Addl. Director, Dr.AK Bhansal chuan rannung seh natna thlen theih dan leh a chanchin a sawi a, Mizorama a awm chhunga Primary Health Centre thenkhat a tlawhah te hnathawktute hnathawh dan leh inpek dan chu a fak bawk. Pu Bhansal chuan District Hospital Laboratory tihchangtlun a tul dan leh hnathawktu tam zawk dah a tul dan a mit ngeia a hmuh thu leh sorkar laipui lamah pawh tan lak pui a tum dawn thu a sawi a ni. He training-ah hian AH&Vety Deptt. Joint Director, Dr. Hmarkunga pawhin mihring ran vulh leh ramsa te atanga natna kai theih ‘zoonotic disease’ chungchang sawiin Mizoram mite zingah hetiang natna kai hi an awm tak nual thu a sawi a ni. He Training-ah hian Dr. AK Bhansal bakah Dr. Suhas Dhandore, Dr. Ashok Talyan, Lalthazuali Kawilam, Dr Pachuau Lalmalsawma leh Entomologist, Pu Lalfakzuala Pautu ten zirtirna an pe a ni. Tun hnaia Mizoram hmun thenkhata rannung seh natna leng chungchangah hian State Nodal Officer, Dr. Pachuau Lalmalsawma chuan thuchhuah siamin mipuite chu chiai lo tur leh thu belhchian dawl lo thehdarh lo tur leh ringlo turin a ngen a, he natna hi ramsa leh sazu atangin mihringin a kai hnuah mihring atangin a kai chhawn leh theih tawh loha, rannung seh natna vei awmna khua te pawh tlawhserh leh thinhrik loh tur niin a sawi a ni.
