Police te chuan he Whatsapp group mi leh sa te hi kar kalta-a JNU zirlai leh zirtirtute beihnaah a bultumtu niin an ngai a, an nihna hriat chian tawh zinga 10 te chu pawn lam mi an ni tih finfiah a ni tawh tih an sawi. JNU luhchilha kut inthlakna thlengah khan mi 34 an hliam a ni.
Tharum thawhtute hi Left party te thlawp zirlai leh BJP zirlai pawl ABVP te nia hriat an ni a, JNU an luh theihna tur hian zirlaiten an pui nia hriat a ni bawk.
Mi 37 an nihna hriat chian tawh zinga pakhat chu Manish Jangid a ni a, JNU-a ABVP secretary nilai a ni a, a phone a chhiat lai a nih avangin WhatsApp group ah hian telh ve a ni tih a hre lo niin a sawi thung.
JNU Vice Chancellor Jagadeesh M Kumar chuan zirlaite a kawm a, hei hi tharum thawhna thlen hnua zirlaite a kawm hmasak berna a ni.
January ni 5-a tharum thawhna thleng chungchangah hian Vice chancellor hian sawisel a hlawh nasa hle a, zirlaite leh thawktu \henkhat chuan bang turin an phut a ni.
Zirlaiten kut an tawrh laia engmah ti lova puh Delhi Police te chuan man an la nei lo a, hliam na tak tuarte zinga mi JNU zirlai pawl hruaitu Aishe Ghosh-i chu police te hian tharum thawhna chawk chhuaktu nia an rinhlelh mi 9 te zingah a tel niin an sawi.
Aishe Ghosh-i hian hmaituam zingah a tel lo tih chu thil lang chiang sa a ni a ti a, kut tuarte zinga tel a nih thu leh a kawr thisen kai te pawh hmuh theihha a la awm thu a sawi.
