Delhi High Court-in Uttarakhand Police 7 thiam loh chantir, dam chhung tang turin ti

Kum 2009-a Uttarakhand police-ten zirlai kum 22 mi an kahhlum chungchang thubuai kal zelah, Delhi High Court chuan police 7 thiam loh a chantir a, dam chhung lung in tang turin a hrem. He thubuai hi Trial Court chuan kum 2014 khan a lo ngaihtuah tawh a, khami tuma thiam loh a chantir police dang 10 chu Delhi High Court hian thiam a chantir thung a ni. Police-te hian an mi kahhlum, Ranbir Singh hi a thurualpui midang pahnih-te nen police silai ruksakin, Dehradun-ah pawi khawih tumin an kal niin an sawi a, police-te hi khatih hunlaia President Pratibha Patil-in Uttarakhand a tlawh dawn laia duty-te an ni a, CBI chuan Dehradun-a Ranbir Singh leh police-te an inbei nia sawi hi phuahchawp a nih thu leh, police-te hian dawt phuahchawp an sawi tih Court hi a lo hrilh tawh a ni.