Kejriwal-a lakluhna tur hmun hi Ramlila Maidan a ni a, Delhi Governor Anil Baijal-a nen an inkawmin hnuah lakluh hun tur hi tih chian a ni.
Kejriwal chuan AAP hnehna chu politics bung thar kaina a ni a ti a, Delhi mipuite chuan school te, mohalla clinics te, electric leh tui darkar 24 a thlawna pek vangte-in mipuiten hnehna an chantir nawn leh tih a sawi.
AAP hruaitu Manish Sisodia chuan Pathianni tuka lakluhna inkhawmah hian Delhi mipuite tel turin an sawm tih a sawi a, chief minister rual hian minister dang turte pawh lakluh nghal an ni ang. Minister turte hi puan zar la ni lo mahse, Raghav Chadha chu Finance chang tura ngaih a ni a, Atishi chuan Education chang tura ngaih a ni.
Delhi Assembly-ah hian seat 70 awmin chung zinga seat 63-ah AAP-in hnehna an chang a, seat 7 chu BJP-in an la thung a ni. Kum 2015 inthlanah khan AAP chuan seat 70 zinga seat 67-ah hnehna an lo chang tawh a, term thum a zawnin AAP hian sorkarna a chelh dawn a ni.
