Dehra Dun-a Independence Day lawmna inkhawma tel lo, Uttarakhand IAS officer 54 chu insawi fiah tura tih an ni

Thawhlehni kal taa Dehra Dun-a Independence Day lawmna inkhawma tel lo, Uttarakhand sorkara thawk, IAS officer 54 chu insawi fiah tura tih an ni a, an zingah hian Principal Secy leh Additional Secy te pawh an tel a ni. Tun hi he state-a officer lian, Independence Day lawmnaa an tel loh avanga insawi fiah tura tih an nih vawi khatna a ni a, he hriattirna hi nizan khan state Chief Secretary, S Ramaswamy-a’n a tichhuak a ni. State CM, Trivendra Singh Rawat chuan he hun pawimawh tak hmannaa sorkar mi pawimawh tel lo an tam chu tha lo a tih thu a lo sawi tawh a, Chief Secy. chu heng officer-te kal loh chhan hi zawt fiah tura hrilhin, an insawi fiah dan pawm tlak lohte phei chu an chungah hremna lek turin a hrilh nia hriat a ni. Dist. Bawrhsap te pawh an dist. theuha Independence Day lawmna inkhawma tel lo officer-te chunga hetiang bawka thil ti ve tur hian hriattir an ni a. An insawifiahna pawm tlak loha ngaihte chu an Annual Confidential Report-ah ziak lang tura tih an ni.