Tukin dar 6 pelh hret khan Aizawl Bazarpuia chawhmeh leh thildang zuar mi za chuang zet PHE tui pipe puakin nasa takin a tibuai. Zion Street leh a thlang lama thil zawrhte chu pipe puak atanga tui tam tak chhuakin nasa takin a len darh a ni. Tui puh chhuah chhung hi darkar chanve vel a ni a, hemi avang hian Dawrpui biak in piah Israel Market thlen hmaa kawng ruam laiah tui khup thleng vela thukin a tling a, tui pipe puak atanga tui chhuak hian bawlhhlawh leh lei nawi tam tak a len khawm a, a tir lamah chuan rimchhe lem lo mah se a hnulamah a rim a chhe zui niin thil zuarte chuan an sawi a, he tui pipe puak vanga an thil chhia chu Rs.20,000/- man vel niin an sawi bawk a ni. PHE Deptt. hotute chuan an pipe keh avanga bazara chawhmeh leh thil dang zuarte nasa taka an buai leh an thil zawrh tui putin a tihchhiatsak chu pawi an ti takzet tih an sawi a, he thil duhawm lo thleng hi an hriat lawk loh leh an duhdan ni lo a ni tih sawiin, a tihbuai mipuite hnenah ngaihdam an dil a ni. ZONET zawhna chhangin PHE SE, Aizawl Watsan Circle enkawltu, Pu Lalrothanga chuan he pipe keh hi Aizawl hmar lam chawmtu pipe, inches 14 hawlhtlanga lian a ni a, a kehna hi Dawrpui Biak In kawt, Floria Hotel epa Hustler dawr kawtah a ni a, PHE Deptt. hotute chuan pipe kehna hmun hi vawiin khan an enfiah tawh a, mipui tibuai tam lo thei ang ber turin tlai dar 6:30 atanga hna thawk tanin an siam tha dawn a, chawlhsan lovin an zawhfel thlengin he pipe keh thlak hna hi an thawk dawn a ni.
