Darzo kai Tuipui D lei (Bridge) chu MNF MLA, Pu Lalruatkima’n vawiin khan a tlawh. Pu Lalruatkima chuan Lei chhuat atana hman thingphel chu a tha tawk tawh lo niin a sawi a, hei hi vanduaina a thlen hmaa thlak thuai turin a mawhphurtute a ngen a ni. Pu Lalruatkima chuan he lei hi kum 2016 December ni 19 khan hawn a nih thu sawiin a dawh nan hian cheng nuai 300 chuang sen a ni a, lei dawh hnathawh lai, kum 2014 khan a chim thu leh hnathawktu pakhatin a thih phah bawk tih a sawi a, tundinhmunah a him leh him loh thuneituten enfiah se a duh tih a sawi bawk a ni. Pu Lalruatkima hian vawiin vek khan Hnahthial Electric Venga UD&PA-in Hall a sak zawh tawh luah lova la awm reng leh Keitum Indoor Stadium sak zawh tawh hman loha la awm te a tlawh bawk a, UD&PA-in Hnahthial Electric Venga cheng nuai 100 chuang senga Hall a sak kum 2014 a zawh tawh a sak a chhiat avanga bialtu MLA pawhin hawn tlak loha a ngaih vanga luah lova tun thlenga la awm chu vanduaithlak a tih thu a sawi a, heti chunga a thawmthat nan cheng nuai 15 vel hman a ni leh tawh chu mak a tih thu a sawi bawk. Pu Lalruatkima chuan kum engemawzat liam taa cheng tam tak senga Keitum Indoor Stadium sak zawh tawh hman loha a awm ta pawh tha lo a tih thu sawiin, heng thilah hian thil dik tawk lo inphumru awm ngei nia a ngaih thu sawiin hman tangkai a nih theih nan rang taka hma la turin sorkar a phut thu a sawi bawk.
