Darlawn District Demand Committee-in District pek an nih hma loh chu an thiam ang anga nawr chhunzawm an tum thu an puang a. Vawiina Aizawl Press Club-a thuthar lakhawmtute an kawmnaah Darlawn District Demand Committee Chairman, Pu JMS Dawngliana chuan, kum 1988 atang khan District pek hi an lo phut tawh nia sawiin, kum 30 chhung zet an nghah hnuah pawh an thil phut chungchangah sorkar atanga bawhzuina a awm lo chu an ngaih thiam loh thu a sawi a, Darlawn tlang dung chu anmahni awptu, Aizawl District Headquarters atanga a hlat avangin hmasawnna kawngah pawh an hnufum hle nia sawiin, an tlangdungin chak zawka hma a sawn ve theih nan District thar hi a mamawh bakah tuna District awm sa khawih buai lovin Darlawn District hi remchang takin a siam theih nia an ngaih thu a sawi. District thar siam tura an beisei huam chhung atangin hmasawn duhna avanga silai lekte pawh an awm hial nia sawiin, District thar hi pek an nih loh a, tun anga zela an kal chuan remna leh muanna vawn kawngah pawh Mizoramin a chhiat phah an hlauhthawn thu pawh Pu JMS Dawngliana chuan a sawi a ni. Darlawn District Demand Committee hruaitute chuan, District thar an dil ve mek laia Saitual District Implementing Demand Committee-in an District huam chhunga an rin lut chu tha lo an tih thu leh Saitual District-a beh chu an duh ngai loh tur thu an sawi bawk.
Zawhna chhangin Darlawn District Demand Committee hruaitute chuan, Sorkar-in Saitual District chu tihhlawhtling mah se an thik lo niin an sawi a. Hetih rual hian Saitual District chhunga rin luh an nih chuan a tawp thlenga an dodal tur thu leh, demand Area chhungah Darlawn District-a beh duh lo an awm lo nia an hriat thu te leh an huam chhunga silai nena chhuak mekte pawhin Darlawn District tihpuitlin chu an duh nia an hriat thute an sawi bawk. Darlawn District Demand Committee hruaitute hian vawiin khan CM, Pu Lal Thanhawla hmuin an thil phut chungchang hi an sawipui a ni.
