Cyclone Ockhi vangin mi 8 thi tawh

Chhim lama state pahnih, Kerala leh Tamil Nadu-ah thli leh ruahpui, Cyclone Ockhi avangin mi pariat vel an thi tawh a, thlipui hian thliarkar 36 awm khawmna, Lakshadweep a pan mek nia hriat a ni a, Kerala bula tuifinriata tangkhang, sangha mantu 43 vel chuan nizan khan him takin vaukam an thleng tawh a, chhanchhuaktu pawlte chuan tuifinriata tangkhang mek, sangha mantu 70 vel chu an be pawp thei tawh nia sawi a ni. Thli leh ruahpui hian khawmualah chuan ziaawm lam a pan nia sawi a ni a, mahse khaw chin zirmite chuan tun a\anga darkar 24 chhung chu Kerala chhim lamah ruah nasa tak a sur an rin thu leh Tamil Nadu chhim lamah pawh ruahpui vanawn a sur an rin thu an sawi a, state pahniha vaukam hnaiah awm, zirna in zawng zawng chu khar vek a ni. National Disaster Response Force leh lawng sipaite chu Lakshadweep-a mi bo zawn leh chhanchhuah hna thawk turin an inpeih reng nia sawi a ni a, Union Home Minister, Rajnath Singh chuan Cyclone Ockhi-in chhiatna a thlen dan hi a en tawh a, NDRF hotu pawh a be nghal tih a sawi. Kerala leh Tamil Nadu-ah hian mi pali ve ve an thi a, Tamil Nadu-a Kanyakumari khuaah phei chuan ruah sur nasa avangin in engemawzat a chhia a, mi 1,000 chuangin an awmna hmun an chhuahsan tawh nia hriat a ni bawk.