Cyclone Gita-in Tonga thliarkar nuai

Pacific tuipui thliarkar ram Tonga chu thlipui na tak, Cyclone Gita in a nuai a, an ram rorelna in Parliament tiamin chenna in tam tak a chhiat bakah tuilian avangin mi tam takin harsatna an tawk bawk. Thlipui hi darkar khata km 200 vela chaka tleh a ni a, thi leh hliam zat pawh hriat theih a la ni rih lo a, Tonga National Emergency Management Office-a Australia Sorkar aiawh Graham Kenna sawi danin mi tam tak an hliam a, a then chu an na hle a ni. Social Media lama thlalak thenkhat tarlan atanga a lan danin Parliament House chu a chim chhe vek a, khawpui chhungah nasa takin tui a lian bawk a, thing tam tak thliin chhem tluk avangin motor kawngpui tam tak a ping bawk. New Zealand Foreign Minister Winston Peters chuan Cyclone Gita in chhiatna a thlen dan kimchang hi chhut chian mek a nih thu a sawi a, thlipui tuartu, tanpui ngai tam tak an awm avangin rang taka chet chhuah a tul tih a sawi. Mi 5,7000 zet chuan hmun hima thiar chhuah nghakin evacuation centre an pan khawm tawh a, an la pun zel rin a ni. New Zealand chuan New Zealand Dollar 750,000 tanpuina a pe nghal a, thlawhna hmangin chhawmdawlna bungraw chi hrang hrang Tonga ah hian a phurlut nghal bawk a ni.