Tun dinhmuna a lan danin Covid 19 hi Mizoram pawn atanga lo lutten an lo hawn a nih loh chuan Mizoramah a awm rih lo nia hriat a ni a, State pawn atanga lo haw tur zingah hian hri leng hluarna hmun atanga lo haw an awm nual avangin fimkhur a ngai dawn hle a ni, a ti a. Damdawi lam thlirna atang chuan mi sing tel lo haw tura zingah vanneih viau loh chuan hri kai an awm ngei rin a ni, a ti.
Dr. Thiamsanga hian, Mizorama lo haw turte hi Rapid Test Kit hmanga vawi 2 endik rawtna a awm thu leh hei hi a hautak dawn vangin tih dan tur chiah sawi theih a la ni lo tih a sawi a. Ngaihdan pakhatah chuan an lo haw atanga ni 10 velah endik ni se a tawk viau a, a tih dan tur hi ngaihtuah zui zel a nih tur thu a sawi. Rapid Test Kit hi a hmaa sing 1 lo thleng bak, a dang engemawzat chah belh leh mek a ni a, chungte chu vawiin hian Delhi thleng tura beisei a ni.
