Kumin March ni 18 khan, Assam University-a MSc (Maths) zirlai Surojit Chakma hian, lehkha zira a awmna hmun a chhuahsan hnuin, a tuk March 19 khan an khua a thlen hnu-ah, mi dang nena inchenpawlh loh turin awm hrantir nghal a ni a, Covid-19 a kai nia mi dangin a rinhlelh thei tur zawnga post a siam chu vawiin khan social media-ah zau taka a darh avangin, Tlabung bakah a chhehvel khaw hrang hrang mipuite an ralkhel hle tih, Tlabunga Zonet reporter chuan a sawi.
A hriselna enfiah tura kal Tlabunga Health department-a thawkte hnenah, Surojit Chakma hian a khua a sik thu te, nasa vak loa a khuh thu leh, a hrawk pawh a thip tel thu, a lo hrilh a; nimahsela tun dinhmunah erawh a hrawk thip a reh tawh bakah, a khuh pawh a reh tawh thu a sawi.
Tlabung SMO Dr. R. Lalnienga leh thawktu dangte chuan, Surojit Chakma chu Covid-19 veite taksaa he natna hnathawh dan nen a inang lo tih hrilhin, ngaih?hat lohna nei lo turin an chah a; nimahsela, mipuite tithlabar zawng leh, mi dangte rinhlelh kai thei tur zawnga thu a thehdarh chu pawi an tih thu an sawi.
SMO leh a thawhpuite hian, Surojit-a chu tlang hrileng satliahin a tlakbuak nia an ngaih thu sawiin, amah enkawlna tur damdawi an kensak an hlan nghal a ni.
