Covid 19 hri leng mek a darh loh nana Sorkar laipuiin March ni 22-a mipuite pawnchhuak lo tura a ngen hlawhtling taka kalpui a nih hnuah Mizoram sorkar chuan mipuite chu kar khat chhung pawn chhuak lo turin a ngen chunzawm a. March ni 23 khan Prime Minister, Narendra Modi chuan ram mipuite COVID 19 laka an him theih nan ni 21 chhung ram pumah inkharkhip a nih tur thu a puan chhunzawm a, he thupek ang hian April ni 14 thleng inkharkhip hi khauh taka kalpui a ni a. Mizoramah chuan April ni 15 atanga May ni 3 thleng inkharkhip hi khauh taka kalpui leh a ni a, inkharkhip thawh 2-na tawp hnu May ni 4 atanga inkharkhip thawh 3-na kalpui a nih atangin thlahdul tan a ni a, inkharkhip thawh 3-na hi May ni 17 thleng kalpui a ni a. Hemi zawh hnuah pawh inkharkhip hi chhunzawm zel a ni a, nimin thleng khan khauh lutuk lova kalpui a ni a. Tun hnai khan Mizoramah Covid 19 hri kai hmuh chhuah belh an nih tak zel avangin nimina Chief Minister Pu Zoramthanga hova inrawnkhawmnaah khauh zawka inkharkhip neih leh ni se tih rel a ni a, hemi ang hian vawiin atang khan khauh zawka inkharkhip hi chhunzawm leh a ni.
Inkharkhip khauh zawka kalpui a nih avang hian khawlaiah mipui vei vak hmuh tur an awm mang lova, hetihrual hian Sorkar pisa-ah Group A hnathawk zawng zawng an kal a, Group B chu zaa 50 leh Group C leh D hnathawk chu hmun 3-a thena hmun 1 an kal avangin khawlaia lirthei tlan hmuh tur a awm nual a ni.
