Damlohnain a tlakbuakte pan theih turin Tlabung SDH-a OPD hi hawn ni leh tawh mah se, damlo na zual deuh hlek nia ngaih leh enkawl hmanhmawh ngaite chauhin pan rih thei se an duh tih, Tlabung Senior Medical Officer Dr. R Lalnienga chuan a sawi a, a mamawh apiangin mobile phone hmanga thawktute an rawn theih dan tur ngaihtuah mek a ni tih a sawi.
Tlabung Sub-District Hospital-a pawnlam mi inentirna hmun OPD khar a nih chhung hian inentir theih loh vanga harsatna lian tham tawk an awm lo tih, Tlabunga Zonet reporter chuan a sawi a, damlo ngaihtuahawm deuh nia ngaihte chuan a remchan anga thawktute bepawpin, an hriselna chungchanga harsatna an neihte thlenin an rawn mai thin tih a sawi.
Covid-19 hripui leng mek hmachhawn tura inhmakhuana kawng khat atan Tlabung Sub-District Hospital-a Ayush building chu he hri vei nia rinhlelhte dah hran nan ruahman a ni a, he building hi pawn lam mite luh pawh theih loh tura khar lailawk a ni a, khum pathum dah a ni.
