Khaw chhak lam ramri-a duty te tlawh kualtu ZONET palai Lalnuntawma Fanai-in an hrilh danin Burma nena an inkalpawhnate khar a anih avangin ei tur lamah harsatna an tawk a. Khaw chhungah chhuan chham chhungkaw 100 chuang an awm tawh a, kar leh lamah chuan a aia tam an awm an rin thu an sawi a, an khua hi leilet leh lo neih lama eizawng awm lohna a nih avangin Burma lam nen inkalpawhna khar hian a nghawng na hle tih an sawi. Tiau ramri-a duty te hi mahni Inah chaw eiin an inhaw chhawk \hin a. Burma atanga rawn kai tum an man pawh an khaw mi leh sa ni mah se, an uma an man hnuah an kir tir leh a ni.
Zokhawthar Task Force te hi Tiau kam hmun 18-ah an duty a, IR, Police leh Assam Rifle te hi hmun 15 ah an inthen darh bawk.
Vawiin khan Bulfekzawl Task Force ten ramri an venna hmun hrang hrang pawh Zonet palai hian a tlawh a. Bulfekzawl Task Force te chuan an khua chu Leilet nei tha an nih avangin ei leh bar lamah harsatna an tawh loh thu an sawi a, hetih lai hian ramri kana lo luh tumte an awm thin avangin uluk takin an veng zel dawn tih an sawi.
Nizana Champhai Zote Task Force te duty na hmun, Tiau lui dung a tlawhnaah Tiau lui kama duty te chuan Burma lam atangin ramvak leh lui kal an rawn awm thin tih an sawi a, heng mite nena inchiahpiah lo tura fimkhur a tul avangin chhun leh zanah lui dung vengin an kal kual reng tih an sawi a. Duty na hmun hrang hrangah hian IR te pawh an duty ve zel a ni.
