Naupang kum tling lo khuaikhema puh mi 2 chu Special Court (Protection of Children from Sexual Offences Act)-in hrehawm taka kum 10 chhung tang tur leh cheng 1,000 ve ve chawi turin a hrem. Sorkar Ukil, Addl. Public Prosecutor, Pu H. Lalmuankima hnen atanga thu dawn danin, West Phailenga mi pakhat chu a fanu, kum 6 mi khuaikhem chinga puh a nih avangin Mamit District Child Welfare Committee Chairman, Pu H. Darhmingliana’n a lakah kum 2014, November ni 15 khan West Phaileng Police Station-ah thubuai a thehlut a, he thubuai ngaihtuahtu, Special Court (Protection of Children from Sexual Offences Act) chuan puh a nihnaah hian thiam loh chantirin hrehawm taka kum 10 chhung lung in tang tur leh cheng 1,000 chawi turin a ti a ni. Aizawl Tuikual North-a mi pakhat pawh nikum January ni 24-a mipa naupang khuaikhema puh a nih avangin Special Court (Protection of Children from Sexual Offences Act) hian thiam loh a chantir a, kum 10 chhung lung in tang tur leh cheng 1,000 chawi turin a ti a, an pawisa chawi tur hi an pek theih loh chuan ni 10 dang tan belh tura tih an ni.
