Kum 2013 August ni 10 zana a nupui thattu-a puh, Lalremruata Ralte, Zarkawt chu Aizawl Additional District and Sessions Judge I, Pu Vanlalmawia Court-in thiam loh a chantir a. Hrem a nih dan tur chu tun thla ni 13 hian Court-in a puang dawn nia thu dawn a ni. Court hotute hnen a\anga Zonet thu dawn danin, he thubuai ngaihtuahtu, Aizawl Additional District and Sessions Judge I chuan kumin July ni 28 khan Lalremruata Ralte hi IPC Section 302 hmangin thiam loh a chantir a, dam chhung lung in tantir emaw, thi tur emaw-a hrem theih a ni dawn a, a unaupa, a nupui ruang paih puitu, Lalthlamuanpuia, Kolasib Hmar veng pawh IPC Section 201 tlawhchhanin thiam loh a chantir bawk. He thubuai ngaihtuahtu, Aizawl Additional District and Sessions Judge I, Pu Vanlalmawia hi a damloh avangin District Judge, Pi Lucy Lalrinthari’n he thubuai hi thla hlui, September ni 22 khan Additional District and Sessions Judge II, Pu Vanlalenmawia kutah a hlan chhawng a, Court chuan heng mi 2-te hrem an nih dan tur chu tun thla ni 13 hian a ngaihtuah dawn a ni.
Puan tawh \hin angin, kum 2013, August ni 18 khan Pi Lalhmingthangi Chhangte, Ramhlun North chuan, a fanu K. Zohmangaihi chu August ni 10 a\anga chin hriat loha a bo avangin Aizawl Police Station-ah FIR a thehlut a. Hemi bawhzui hian Police-te chuan a pasal, Lalremruata Ralte hi an man a ni. Police hmaa a inpuan danin, Lalremruata Ralte hian a nupui, K. Zohmangaihi hi kum 2013, August ni 10 zan khan Zarkawta an chenna inah a that a, a ruang hi a nau, Lalthlamuanpuia, Kolasib Hmar veng nen motor-a phur chhuakin a tuk zing dar 5 velah Sakawrhmuituai khamah an pai a. A ruang hi August ni 19 tlaiah hmuh a ni.
