Tun thla ni 14-a covid-19 kai nia hriat, damdawiin-a lo khung hran tawh, nu pkhat chu test nawn a nih hnuah a result a negative avangin niminpiah khan chhuahtir a lo ni tawh a, amah hi Mumbai Mizoram house-a awmte zinga covid-19 kai nia hriat hmasak ber kha a ni. Vawiin lamah khan cancer vanga damlo dang pahnih, test hmasa lama hri leng kai nia hriat, Damdawiin-a lo khung hran tawhte chu an result a negative tih hriat leh a ni.
Mumbai Mizoram House hotute hnen atanga thudawn danin, vawiina negative leh ta mi pahnihte hi Mizoram house-a damlo awm mekte a hlawma test an nih tuma positive anga hmuhte zinga mi kha an ni.
Mizoram House Mumbai-ah hian Covid-19 positive 8, Mizo 7 leh hnam dang 1 hmuh an ni a, heng zing atang hian mi 3 chu an negative tih hmuh chhuah a ni leh ta a, heti hian covid-19 nia rinhlelh, Seven Hills Hospital-a enkawl mek chu mizo 4 an la ni tihna a ni a, Mizoram house-a thawk, hnamdang pakhat chu khung hranna hmunah dah a ni thung.
Mumbai Mizoram house-ah hian thawktute tiam lovin damlo leh an mahni awmpuitu mi 48 an awm mek a, Mizoram House atan hian in chhawng sang takah, chhawng hnih luah a ni a, building pakhata an chenpui hnamdangten an ngaihmawh avangin insawn thawl dan dap turin Mizoram sorkarah pawh an thlen a, ei leh bar lamna kawngah harsatna lian lutuk la tawk lo mahse, a vela an chenpuiten an thinhrik avangin harsatna engemawchen an tawk mek a ni.
