MPYCC hian, March ni 23-a ram pum huap inkharkhip kalpui a nih hnuah Mizoram chu dinhmun ziaawm deuha a lan vangin tun thla ni 4 atangin inthlah zalen deuh a ni tih an sawi a, sumdawngten dawr an hawng tan leh chauh tihah, GST return file tura tih an ni chu an hrethiam lo tih an sawi a, Mizoram sumdawng inzawmkhawm pawl lian ber, Mizoram Merchant Association pawhin hei hi an tih theih loh tur thu Thawhtanni khan thuchhuah an siam hial a ni, an ti.
Licence tih nun leh lirthei chhiah pek hun innangte ngaihhnathiamna awm lova late fee chawitir an awm nia lang chu thil tha lo tak a ni tih MPYCC hian an sawi a, hmun thenkhata Maxi Cab Counter License neitute pawh chhiah an pek loh avangin ticket pe chhuak tawh lo tura hriattir nia an hriat thu an sawi a, State thenkhat chuan lirtheia eizawngte hnenah tanpuina a pek zawk hial laia Mizoram Sorkar chet dan chu hriatthiam har an tih thu an sawi. Inkarkhip chhunga kawlphetha hman man khawn theih loh, tuna khawn mekah pawh Bill nasa takin a pung niin MPYCC hian an sawi a, kawlphetha hman man hi tihsang rih lo turin sorkar an ngen a ni.
