Lok Sabha inthlanpuia an chet chhiat chhan thlirin Congress Working Committee hi vawiin khan an \hukhawm a, kum tam tak chhung kalphunga an lo neih tawh, Nehru-Gandhi chhungkaw hruaina hnuaiah Congress party hi a awm chhunzawm leh dawn a ni.
Congress hian an chet chhiat ber \um 2014 inthlanpui-a an seat lak zat 44 chu tun \um inthlanpuiah khum hret mahse seat 52 chiah an la phak a, an chak loh chhanah mawhphurhna la-a kum 48 mi Rahul Gandhia’n ban a tumna chu congress hruaitu pawimawh zual \hukhawm hian an pawmsak lo a, a hmalakna chu fakin party kalphung siam\ha tura thuneihna a kutah an dah chhunzawm a ni.
Maharastra Congress President Ashok Chavan chuan an chak loh chhanah Rahul Gandhi chauhin mawh a phur lo tih a sawi a, state tin president \heuhin banna thehlut se, party kalphung siam\hat hna thawh a ngai a ni a ti a, amah pawhin banna thehluh a inpeih tih a sawi.
Lok Sabha inthlanpui zawhfel takah Rahul Gandhi leh a unaunu Priyanka Gandhi Vadra te hi an campaign ngawrh hle a, chuti chungin Prime Minister Narendra Modi kaihhruai BJP leh a thawhpuite chuan seat 350 zet an hui a ni.
Congress party hian state leh union territory 17 ah MP an nei zo lo a, December thla maia hnehna an channa State lian zingah pawh Chhattisgarh ah seat 2, leh Madhya Pradesh ah seat khat chauh an la phak a, Rajasthan ah phei chuan lak an nei lo a ni.
Priyanka Gandhi-in nasa taka campaign beihpui a thlakna, Seat 80 awmna Uttar Pradesh-ah pawh Congress hian seat khat chiah la in hei hi Sonia Gandhi-a bial, Raebareli a ni a, he state ah hian Prime Minister Narendra Modi chuan Varanasi bialah vote nuai 4 sing 7 in hnehna a chang a, Rahul Gandhi hian Kerala Wayanad bialah hnehna chang mahse a bial ngai Amethi chu BJP candidate Smriti Irani lakah a hloh bawk a ni. 2014 inthlanpuiah khan khatihlaia Congress President Sonia Gandhi leh vice president Rahul Gandhi te khan banna thehluh an lo tum tawh a, tun \um inthlana an chet chhiat chhunzawm leh avangin hruaitu thlak chungchang hian sawi a hlawh zual a ni.
