Mizoram mipui rilruah Pu Zoramthanga duhkhawp lohna nasa tak a awm mek niin Congress Party hian an sawi a, Mizoram sum dinhmun dik tak a sawi thei tlat lo leh, awmze nei loa cheng nuai tam tak luanralna sawi mam a tum tlat chu thil mak, ngaihdam mai theih a nih loh avangin Finance Minister a nihna chu thlak a ngai a ni, an ti.
MPCC hian, Mizoram sorkar chu sum leh paiah a harsa takzet em tih leh sum leh paiah eng nge a dinhmun dik tak tih chu Mizoram mipui thinlunga zawhna lian tak awm mek a nih laiin, Thawhlehnia Chief Minister-in mipui hnena thuchah a tihchhuahah Mizoram sum dinhmun dik tak a sawi thei lo a ni an ti a, kha khan Finance Minister ni zel tlak a ni loh zia chiang takin a lantir a ni, an ti a. Mizoram sum dinhmun, “Pathian chauhin a hria” tia mipui zawhna a chhang pial phei chu mipui zah lohna dik tak nia an ngaih thu an sawi a. Assembly Speaker meuhin a zahawmna bo thak khawpa MLA rualte hnena vehbur a khawnsak hial laia sum dinhmun hre lo khawpa Finance Minister ber a awm chu mipui tan ngaihdam theih a ni lo tih an sawi.
MPCC hian, Mizoram sorkar-in cheng nuai 99 chuang senga PPE a lei zinga zaa 75 vel zet hman tlak loh a awm nia sawiah mipui sum cheng nuai tam tak dik lo takin a luangral ngei tih a chiang a ni an ti a, he thilah hian MPCC chuan ACB-ah FIR an lo thehlut tawh tih sawiin, heng sum hmanna dik lo hi Finance Minister hian ui hle tur a nih laiin, “In kang thelh nan chuan tuinu pawh kan hmang fo” tia mipui hmaah sawi mam a tum chu hriatthiam theih a ni lo an ti a, hetiang a nih avang hian Pu Zoramthanga chu Finance Minister ni zel tlak lovah Congress Party chuan a ngai a ni an ti a. Chief Minister la ni tho mah se, Finance Department chu midang kutah dah zawk mai turin an ngen tih an sawi.
