Thuchhuah an siamah MPCC hian, COVID-19 laka inven nana chhungkua in lama an awm tam hunlai a nih avang te, uluk taka kut silfai a ngaih fo avangin chhungkaw tinin a hma zawng aiin tui an hmang nasa ta niin an sawi a. Uluk taka kut sil turin a tlem berah tui litre 1 vel a ngai nia sawiin, ni khatah kut vawi 10 vel sil turin mi pakhatin litre 10 zel a mamawh belh tihna a ni a, chhungkaw member tam dan a zirin ni khata chhungkaw pakhat tui mamawh chu nasa takin a pung dawn tihna a ni a ti.
Hetih lai hian khua a thalin, a ni telin tuihna a tlem tial tial bawk tih Congress party hian an sawi a, Tui mamawhna nasa taka a pun lai hian Aizawl khawpuia veng thenkhatah chuan chawlhkar tin tui sem theih a ni tawh lo a ni an ti a, tui hi a haw chhunah pawh a haw tlem thei hle nia sawiin, khawpui dang leh thingtlang lamah pawh tui harsatna hi a nasa sawt hle a ni an ti.
Hetiang hi Mizoram dinhmun a nih avangin tui ren lehzual turin Mizoram mipui an ngen tih an sawi a. Mipui harsatna hria hnianghnar zawka mipuiten tui an hmuh theih nana tan la lehzual turin Mizoram sorkar leh PHE Department an ngen tih an sawi.
