Congress Party Communication Department-in sorkarin zirtirtu 946 MR-a lak a tumnaah Dan pathum tih danglam tum a ni tih sawiin, Education Minister in dan dik taka lak an ni dawn tih a sawi chu Dan zah lohna a tling niin an sawi.

Primary sikul zirtirtu 882 leh middle sikul zirtirtu 64, a vaiin 946, MR-a la tura Deptt. of Personnel & Administrative Reforms in May ni 2-a lehkha a tih chhuah chuan Dan dinglai pathum lai a kawihkul a ngai nghal niin an sawi a, Sorkar laipuiin Right to Education Act a duan anga National Council for Teachers Education in ruahmanna a siam, zirtirtu hna dilte’n MTET an neih a ngai tia tarlanna Dan dinglai Mizoram School Education (Group B posts) Recruitment Rules 2015 chu Mizoram sorkar hmalak tum danin a bawhchhia a ni an ti a, hei bakah hian zirtirtu hna dilte’n computer thiamna an nei tur a ni tih, Mizoram Group A, B & C Posts Service/Recruitment (Ammendment) Rules, 2016 te leh MPSC hnathawh tur tarlanna Mizoram Public Service Commission (Limitation of Functions) Regulation, 1994, Regulation 3(a) te bawhchhiat a ni dawn a ni an ti.

MPCC Communication Dept hian School Education minister Pu Lalchhandama Ralte chu dan dikin zirtirtute an la dawn tih a sawi zui dawn anih chuan zirtirtu hi MPSC kaltlangin, sawi buai theih lohva lak tir mai turin an phut tih an sawi.