Tukina Lunglei-a thuthar thehdarhtute a kawmnaah Pu Lalnghinglova Hmar chuan, sorkar laipuiin Act East Policy a duan chu a zirchian ve \hin thu sawiin, he thilah hian Prime Minister leh minister dangte thusawi bak policy document mumal tak a lo la awm meuh lo a, MP atana thlan tlin a nih chuan mumal zawk leh Mizoram tana \ha zawk tur policy a awm theih nan hma a lak tur thu leh a \ulna hmunah a bawhzui tur thu a sawi a, hmasawnna tur \ha tak pawh a chhawrtu tur ram mipuiten an chhawr loh chuan awmzia a awm loh avangin ramri-a insumdawntawnna chu Mizoram leh Mizo mipuiten an chhawr \angkai theih dan tur ber zawngin a bawhzui dawn niin a sawi.
Bangladesh nena inkalpawhna atana passport emaw lehkha eng emaw ngai \hin pawh kenkawh mumal a nih tawh loh thu sawiin, Pu Lalnghinglova Hmar chuan, tunah hian Bangladesh a\angin a duh duh an lo lut a, a duh duh an chhuak a, ramri inkalpawhna chu state sorkar kut a nih chiah loh avangin state sorkar tan tih theih loh chin a awm \hin a ni a ti a, MP a nih chuan hemi kawngah hian \an a lak tur thu leh ramria check post mumal tak siam pawh a thil ngaih pawimawh a nih tur thu a sawi a. Chhim lam mipui ngaih pawimawh Lungleia MZU Southern Campus din chu a thil ngaih pawimawh zinga mi a ni tih sawiin, MZU chu central university a nih angin state sorkar tih theih bakah MP-a thlantlin anih chuan, a hlawhtlin theih nan a bawhzui dawn tih a sawi.
Pu Lalnghinglova Hmar chuan, Journalist a nih angin chanchinbumite chu an mamawh leh harsatna hretu a ni tih a sawi a. MP a nih chuan journalist-te hmasawnna atan theihtawp a chhuah tur thu sawiin, campaign laia intiam chu a thil duh loh ni mah se, a journalist puite a tlan chhiatsan loh tur thu a sawi. MNF President-in CAB bak an khingpuiten beihna tur an hriat loh thu a sawi chungchanga zawhna chhangin Pu Lalnghinglova Hmar chuan, a khingpuite beih vak vak chu a tum a ni lo tih a sawi a, nikum Assembly inthlanpui neih dawn khan MNF pawhin amah chu an sawm ve avangin anni lam pawhin an duh der ve nia a hriat thu a sawi.
