Company thenkhat, product nei lo leh product zuar ni lo, hlawkna an hmuh theihna tura scheme ho lam te te siama, joining leh scheme subscription fee atana mipui pawisa laa sum virkualtir thin Mizoramah an awm mek tih Police ten an sawi a, heng mite sumdawn dan hi Dan kalh a nih avangin fimkhur turin mipuite an chah.

Heng company anga in chhal te kalphung ber chu Youtube video clip ‘view’, ‘like’, ‘subscribe’ leh online internet hmanga tih tur chi hrang hrang an chhawp chhuah leh company member log-in tawhte’n an hnuaia downline member an hmuh tam dan ang zela hlawkna pek thin a ni tih Police te chuan an sawi a. Heng company-te hi zirchian an nih hnuah, Dan lova thilti eng emaw zat
hmuhchhuah tawh an ni a, hnathawk zui lo tura tihtawp zel an ni tih Police te chuan an sawi.

Heng company-te hian an bum tur mipuite’n an rin theihna turin sorkara inziah luhna (registration) a hmingin nei ve mahse, an thiltih ang tih theihna tur phalna nei lo an nih bakah hetiang anga sumdawnna hi Danin a khap tlat a ni tih Police te chuan an sawi a, hriatfiah duh neite chu Economic Offences Wing, SP(CID Crime) Office be pawp thuai turin an chah a ni.