MPCC President, Pu Lal Thanhawla’n MPF hruaitute zingah an Party chhiatna tura thil ti duh an awm nia sawiin, mak a tih thu, vawiina Congress Bhavan-a inkhawmah a sawi a. MPF chu Mizoramah inthlanna thianghlim leh felfai a awm theih nana thawk tura din a nih laiin, an zingah Congress Party chhiatna tura thil ti an awm nia sawiin, inthlan dawna thil dik lo tih theihna awlsam ber, in kaw kipa luh, Door to Door Campaign chu khap tur nia a ngaih laia MPF-in a phal tlat chu mak a tih thu a sawi a ni. Pu Lal Thanhawla chuan, inthlan leh hun hunah an Party chu sorkar leh tura an dinhmun a that avangin mi thenkhatin sawi chhiatna tur an zawng mek niin a sawi a, thil danga beihna tur an hriat loh avangin an tawng sual an chang niin a sawi bawk. An laina hnaite zinga an Party mi ni lo chu engah mah a ngaih loh thu a sawi lai thlalak theh darh a nih chungchangah Pu Lal Thanhawla chuan, hemi chungchanga a ngaihdan chu a la sawh sawn lo niin a sawi a. Tute nge an nih pawh a hriat lohten thih ngam hiala an tan laiin, a thisen zawmpui zinga an Party mi ni lo chu engah mah a ngai lo nia sawiin, he thu hi lak kawih chi pawh a ni lo niin a sawi. CM chuan, an sorkar loh chhungin hmathlir nei loten thuneihna an chan avangin tun dinhmunah hian Mizoram a ding niin a sawi a. Sorkar hmasa kih hnawk then fai paha an kal chungin hmasawnna a thleng chho mek a, an kih hnawk hi then tur awm lo phei sela chuan tun aiin hmasawnna hi a chak zawk dawn niin a sawi bawk.
Pu Lal Thanhawla hian MPCC Communication Department-in an Party puala Website a siam thar, www.mpccmizoram.org chu a tlangzarh a, an party mipuite chu he website thar hi tangkai taka hman tum tura chahin, an party mi ni chiah lo, Social Media-a thudik lo vawrh darh chingte pawh thudik hriatna atan hman tangkai tum turin a chah bawk. He inkhawm hi MPCC Communication Department Chairman, Pu PC Laltlansanga’n a kaihruai a ni.
