YMA, MUP, MHIP, MZP leh MSU te telna, NGO Coordination Committee hi vawiin khan Aizawlah an \hukhawm a, Union Home Minister Amit Shah, BJP National President nibawkin karleh Inrinni, October ni 5-a Mizoram a rawn tlawh turah Citizenship Amendment Bill sorkar laipuiin thar thawh leh a tum chu an duh loh zia lo lantir an rel a, a lo kalna tur Aizawl khawpui kawngdungah Mizo mipuiten pawndum bat-a, CAB-16 duh lohna thuziak te keng chunga lo din nise an ti a, an hmalakna chu thlawp turin mizo mipuite an ngen bawk a ni.
Hmarchhak bial state hrang hrangin na taka an dodal, Citizenship Amendment Bill hi BJP kaihhruai central sorkar chuan thar thawh leh a tum mek a, Lok Sabha inthlanpui neih dawna an intiamna, election manifesto zingah pawh an telh a ni. North East Democratic Alliance NEDA Convener Himanta Biswa Sarma chuan Thawh\anni khan Silchar leh Karimganj ah te BJP worker te hmaah thu sawiin CAB hi November thlaah Parliament ah pass tum a ni dawn tih a sawi a ni.
CAB hi kum 2016 July ni 19 khan Lok Sabha ah putluh a lo ni tawh a, Joint Parliamentary Committee zirchian tura dah a ni a, report an thehluh hnuah kumin January ni 8 khan Lok Sabha ah pass a ni a, Rajya Sabha ah a tlang hmaa Lok Sabha term dinglai a tawp tak avangin tunah hian Central-a BJP kaihhruai sorkar chuan thar thawh leh a tum mek a ni.
CAB hi India khua leh tui nih theihna dan dinglai siam\hatna tur a ni a, Afghanistan, Bangladesh leh Pakistan-a Hindu, Sikh, Buddhist, Jain, Parsis leh Christian sakhaw betu, India rama pemlutten kum 6 an awm tlin tawh chuan awlsam zawka khua leh tui nihna an hmuh theihna tur a ni.
He dan siam\hat tumna hi a tlang anih chuan Bangladesh a\anga Chakma pemlut tam takin khua leh tui nihna awmsam takin an nei thei dawn nia hriain Mizoram NGO coordination Committee hian an dodal a ni.
