Bandh hi zirlai pawl hrang hrang \angho buatsaih a ni a, Assam ah chuan All Assam Students Union in Bandh hi huaihawtin Asom Gana Parishad AGP chuan a thlawp a, AGP hian BJP kaihhruai sorkar a thlawpna chu nimin khan a hnukdawk a ni. Meghalaya BJP thlawptu NPP hotupa Conrad K Sangma pawhin he bill hi an duh loh thu sawiin, na taka dodal nise tiin Meghalaya sorkar cabinet meeting chuan a rel a ni a ti a, Bill hi pass ni ta se, BJP a thlawpna a hnukdawk dawn em tih zawhna chu a tul anga an la ngaihtuah tur thu a sawiin, Citizenship Amendment Bill chu an duh loh thu NDA sorkarah chiang takin an hriattir tawh tih a sawi. NDA leh NEDA-a tel Mizorama sorkar lai MNF party president Pu Zoramthanga pawhin he bill hi an duh loh thu sawiin, dodalna lantira NESO leh MZP ten Total Bandh an huaihawt chu za-a za-a an thlawp thu a lo sawi tawh bawk.
Assam ah chuan Bandh huaihawttute hian kawtthlerah te motor ke chhiate halin lirthei chevel tur an dang a, Guwahati, Tinsukia leh Dibrugarh District ah te tharum thawhna tenau a thleng tih Police te chuan an sawi. Guwahati leh Dibrugarh Dist ah te rel service tih tawp vek a ni a, lungawi lohna lantirtute hnawhdarh an nih hnuah Delhi pan tur Rajdhani Express erawh tlan tir a ni thung. Bandh neih chhung hian zirna in, sumdawnna hmun, sorkar pisa leh mipui punkhawmna hmunte khar vek a ni. Bandh hi North East Students Organisation NESO bultumin hmarchhak biala zirlai pawl hrang hrangin an buatsaih a ni a, Assam bikah chuan pawl hrang hrang 30 chuangin Bandh hi an thlawp a ni.
Citizenship Amendment Bill hi Citizenship Act 1955 siam danglamna tur a ni a, he dan hnuaiah hian \henawm ram, Bangladesh, Pakistan leh Afghanistan a\anga pemlut Hindu, Sikh, Bhuddhist, Jain, Parsi leh Christian te chuan lehkha mumal nei lo pawh nise kum 6 hnuah India khua leh tui nihna an dil thei dawn a, hei hi hmarchhak bial mipuite chuan an dodal a ni.
