Citizenship Amendment Bill-2016 chu vawiin khan Rajya Sabha Session-ah ngaihtuah turin Supplementary List-ah telh a nia, amaherawhchu thil dang tih tur pawimawh a awm vang leh House-a buaina a awm zui avangin he bill hi vawiin khan sawiho a ni ta rih lo a ni.

Zonet zawhna chhanin Rajya Sabha member, Pu Ronald Sapa Tlau chuan vawiin session-ah he bill bakah hin bill tenau 2 dang lut a awm a, chungte chu sawihoa pass an nia, Opposition leader, Congress hruaitu nibawk, Pu Gulam Nabi Azad chuan House-a President thusawi sawihona neih a rawta, chu chu member dang ten an thlawp bawk avangin, President thusawi hi sawiho tura dah a ni ta niin a sawi. Rajya Sabha Session hi naktuka tawp tur a ni a, amaherawhchu, pawhsei theih a nih bakah, naktukah pawh CAB hi ngaihtuah leh theih tho a nih avangin, pass anih dawn leh dawn loh sawi chian theih a la ni rih lo.