China pasaltha lim kutzungpui rubotu na taka hrem China sorkarin phut

US Philadelphia Franklin Insitute-a pho chhuah, China pasaltha lim pakhat kutzungpui rubotu chu na taka hrem a phut tih China Sorkar in a sawi. Kum 2,000 zeta upa he milim hlutna hi dollar maktaduai 4.5 nia chhut a ni a, Philadelphia Franklin Institute ah hian loan-a pek chhuah a ni. Kar kalta khan Michael Rohana chu he thil kaihhnawihah hian rukruk thubuai siamsak a lo ni tawh a, bail-a chhuah tir leh nghal a ni. He milim, Terracotta Army hi thil hlui lai chhuaktute hmuh chhuah zinga a langsar ber pakhat a ni a, Court lehkhapawimawh atanga a lan dan chuan kum 24 mi Rohana hi Franklin Insitute ah hian december ni 21 khan Ugly sweater party ah a tel a, Terracotta Warriors dahna hmunah hian a lut a, khatih hunlai khan he hmun hi khar a ni nghe nghe. Rohana hian a mobile phone hmangin milim hi thla a lak pui a, chumi hnuah milim kut veilam chu khawihin a kutzungpui a ulh tliak a, milim kutzungpui chu a ak chhuak a ni. Museum-a thawktute chuan milim kutzungpui a bo tih hi January ni 8 khan an hre chhuak a, FBI te chuan Rohana thil tih hi an chhui chhuak ta. Thu an zawhfiahna ah milim kutzungpui hi dawhkan pawhdawhah a dah niin a insawi. Shaanxi Cultural Heritage Promotion Centre Director Wu-a chuan Franklin Institute fimkhur loh dan chu demawm a tih thu a sawi a, mithiam pahnihte US ah hian tirh an nih tur thu leh milim hmelhem hi siamthat a nih tur thu a sawi a, zangnadawmna pawh phut a nih tur thu a sawi bawk. Terracotta Army tia sawi, milim te hi Kum BC 210-a boral tawh Chinese emperor Qin Shi Huang siam a ni a, kum 1974 khan Xian City ah loneitu thenkhatin an lai chhuak a ni.