China doctor rual hi Kim Jong Un hriselna chungchanga thuthar inkalh tam tak awm karah an zin a, hei hian Kim Jong Un hriselna chungchangah eng nge a kawh tak tih erawh sawifiahna a awm lo a ni.
Chinese Communist Party hnuaia International Liaison Department chuan Ningani khan Beijing chhuahsanin North Korea an pan a, he department hi China leh North Korea inkara hna thawktu ber a ni.
Liaison Department hi Reuters-in biak pawh a tum a, a hlawhchham rih a, Chinese Foreign Ministry pawhin an biakna an chhang nghal mai lo a ni.
South Korea sorkar hotute leh Chinese Liaison Department te chuan Kim Jong Un hi zai a nih hnuah a dinhmun a derthawng hle tih thuthang a awm avangin an ngaihven nghal a, South Korea hotute chuan North Korea ram chhungah nunphung danglam hmuh tur a awm lem lo tih an sawi.
North Korea hi ram dang lakah an inlak hran avangin a chanchin hriat a har hle a, Reuters pawhin Kim-a dinhmun hi an sawi chiang thei bik lo a ni. North Korea chanchinbu lamin a chanchin an chhuah hnuhnun ber chu tun thla ni 11-a inhmukhawm a hruai \um kha a ni.
Kim Jong Un kum 36 ni meka ngaih hi kum 2014 khan thla 1 chuang an ramchhung chanchinbu mite lakah a lo bibo tawh a, a hnuah an ram TV-ah kebai chunga a kal lai hmuh a lo ni tawh a ni.
