Xi Jinping chuan Hongkong hlawhtlinna leh nghehna chu China-in a tungding zel tih a sawi a, Hong Kong khawpuia mipuiten lungawi lohna an lantir erawh a sawi lang lo a ni.
A lawmnaah hian sipai ten parade an entir bakah, mi 1,00,000 velin thil chi hrang hrang entirin intihlimna hun butsaih a ni a, sipaite chuan indona ralthuam thar an pho chhuah bakah Europe khawmualpui a\anga United State thlenga kahchhuah theih missile te, drones te, tank leh thlawhna te an entir a ni.
He ni lawmna neih tura buaina a chhuah loh nan thuneitute chuan ram chhung hmun hrang hrangah hma an la a, a bikin Beijing-ah chuan he ni lawmnaa buaina a chhuah loh nan venhimna lam pawh khauh taka kalpui a ni.
Tiannanmen Square leh a chhehvel chu tlawh pawh theih loha khar a ni a, a bul hnaia chengte chu pawn chhuak lo tura hriattir an ni bawk. Mihring phur Relte pawh uluk taka endik a nih bakah dan phala thlawk thei chi hmanrua te pawh hman khap a ni.
Mao Zedong-a kaihhruai Communist Party-in civil war-a Nationalist Party a hneh hnu, kum 1949 October ni 1 khan The People’s Republic of China hi din a ni a, hemi ni hian a lawmna inkhawm Tiananmen Square-ah buatsaih a ni.
Hong Kong-ah pawh he ni hi sorkar chawlhah puan a ni a, amaherawhchu mipuiten lungawi lohna lantirna ni-ah an hmang a ni.
Lungawi lohna lantirtute hian sorkar chu Victoria lawngchawlh hmunah halmawi hal lo turin an ngen a ni. Ammiralty chhehvelah chuan mipui pungkhawmte hnawh darh nan Police ten ‘hnawtdarh nge an duh, silaia kah’ tih thuziak an keng a, mittui tlakna hlo an hmang bawk.
Heng mite hian China national flag chu halin, Hong Kong zalenna sual chhuak tur leh Hong Kong tana an din tlat tur thu an au chhuahpui a ni.
