Sorkar lam a\anga ZONET thudawn danin Tripura Bru Camp-a awm mi 218-te hming Mizoram Electoral Roll-a Kolasib Bawrhsap, Dr. Arun T-in a thun thar chungchanga lungawilohna entirna tura Kolasib NGO Coordination Committee-in an Bawrhsap, Dr. Arun T. vawiin tlai dar 5 hmaa Kolasib chhuahsan tura hriattirna nimina an pek chungchangah hian Chief Secretary chuan nimin tlai khan NGO Coordination Committee nena meeting hmanhmawh a kova, hetah hian NGO hruaitute chu Kolasib-a kala Kolasib NGO Coordination Committee hruaitute leh Bawrhsap inkara palai hna thawk tur leh inepna boruak tihdaih tum turin a ngen a, CS ngenna bawhzui hian nizan dar 10 vel khan NGO Coordination Committee aiawhin CYMA Vice President, Pu R. Lalngheta kaihhruai tlawmngai pawl aiawhte Kolasib-ah an kal a, tukin khan Sub Hqrs. YMA Office-ah meeting an nei nghal a, hetah hian Kolasib District NGO Coordination Committee chu an thil tih tumah Bawrhsap nena inremna neih theih dan ngaihtuah turin an ngen a, Bawrhsap Dr. Arun T pawh Kolasib mipui hmaa thupha chawia boruak \ha siam dan tur zawng turin thurawn an pe a, hemi hnu chawhnu lam khan Aizawl panin an lo let a ni. Heng mite hi an hruaitu CYMA Vice President, Pu R. Lalngheta bakah President hlui, Pu Lalbiakzuala leh CYMA hruaitu leh MZP hruaitute an ni. Sorkar tirha palai hnathawktute thu thlen hi Kolasib District NGO Coordination Committee chuan zanin dar 7-ah an ngaihtuah dawn nia thudawn a ni.
Puan tawh angin NGO Coordination Committee hruaitute hian Tripura Camp-a Bru awm mi 218 Mizoram Electoral Roll-a thun belh an nih vangin kar kalta Thawhlehni zan khan lungawilohna an lo lantir tawh a, DC Pisa lunga vawmin an lo tichhe nual tawh a, hemi zan dar 10 pelh hnuah Mizoram Joint CEO Pu Zorammuana chuan Special Summary Revision 2018-a Bru Camp a\anga Electoral Roll-a in thun thar dilna form lutte chu ennawn leh vek turin Kolasib Bawrhsap hi a hriattir a, a lehkhaah chuan dik lo taka lo thun tawhte chu form 7 hmanga paih leh vek turin a hriattir bakah ennawn lehna chu khawtlang hruaitute leh NGO te awm lai ngeia neih tur tih a hrilh bawk a ni.
