Assembly rorel inkhawm zawhnaa chhanna hunah Pu Rama hian, raw chi supply tur Department-in a dawn loh thu leh dawng tura tih an nih loh thu a sawi a, mau emaw rua emaw a chi supply turin mimal rawih an ni dawn a, hetihlai hian a supply tu tur thlan ala awm lova tender pawh koh ala ni lo a, phun pawh an la awm lo ti a sawi.
Pu Rama hian raw chinpunna tura a chi siamna tissue culture chu a thiam inti nazawng hnen atangin lak an tum lo tih a sawi a, thil tih sual an hlauh avangin Deptt in uluk taka a enfiah a, tlaka an ngaih chinte chauh an kalpui dawn tih a sawi a, tun dinhmunah Brandisii leh Latiforus chu Mizorama chin ngama an ngaih a nih thu sawiin hetihlai hian Latiforus chu lian thamin an la ti hman lova laboratory lam pawh an la inpeih hman lo a ni a ti a, Brandisii chi pawh duhkhawp an la pek theih loh thu a sawi.
Pu Rama hian Autonomous District Council pathumah pawh mau chinpunna, bamboo production plantation chu kalpui tum a nih thu a sawi a, Mizoram pumpuiah remchan anga kalpui tum a nih thu sawiin, hetihlai hian District tan bika pawisa dah ala awm loh thu a sawi a, Hqrs. in a thlan mi tlemte hnenah sem chauh a la nih thu a sawi a ni. Pu Rama hian, mau sawngbawlna hmunpui, Bamboo Processing Industry din tum a nih thu a sawi a, a hralhna tur lam erawh tihfel ala nih loh thu leh Brandisii emaw mau chi dang emaw suply turin Mizoram sorakarin company emaw mimal nen emaw inremna ziah ala nei lo tih a sawi bawk.
