Ningani kaltaa Sorkar kum kalmek 2019-20 chhunga Mizoram sum hman tur ruahman a pharh tak sawi hona tlangkawmin he thu hi a sawi a, Chief Minister hian Sorkar-in a tum ber chu State sorkar sum thawhchhuah, Gross State Domestic Product leh mimal sum thawhchhuah Per Capita Income tihpun a ni, a ti a. Hemi hlenchhuak tur hian sorkar flagship programme, SEDP hmanga \anlak a ni dawn a, mimal tin thawhchhuah a pun theih nan an mamawh ngaihtuah sakin, a \ul anga hmalakpui an ni dawn a ni, a ti.
State sorkar flagship programme, SEDP bul\an nana Rs. vbch 750 dah a nih piah lamah SEDP hming pu ve chiah lova sum an dahte nen chuan SEDP-ah hian Rs. vbch 1,000 vel zet awm tura ngaih a ni tih Chief Minister hian a sawi a. Central lamah hman sen loh khawp sum tam tak a awm a, chumi haichhuak tur chuan \anlak a ni tur thu sawiin, tuna Mizoram Budget a pharh tak chu a chi tur ang chauh nia sawi chu a dikna a lang chho zel dawn a ni, a ti a. Central Budget chu rinpui ber tur zawk a ni a ti.
Ei leh bara lama intodelh tura \an an lak piah lamah hmasawnna ruhrel din kawngah pawh nasa taka hmalak tum a ni tih CM hian a sawi a, zirna siam\ha turte, vantlang mipui hriselna ngai pawimawh tur leh kawngpui \ha a awm theih nan \anlak a nih tur thu a sawi.
Budget pharh taka State sorkar sum thawhchhuah tur, State’s Own Tax Renevue tihpun a nih chungchangah mi \henkhatin chhiah laksa \henkhat tihtawp a ni chunga hetiang ruahmanna siam an hriatthiam loh thu an sawi chu thil awm tak ni mah se, chhiah a\anga sum lakluh tipung tur hian tui hman man leh eng chhit man te bakah bill dangte \hahnemngai zawka khawn tum a nih thu sawiin, Pu Zoramthanga chuan, hei hi hlawhtling taka kalpui theih beisei a ni, a ti a. Nikum lam Budget nen khaikhina a inan lohna eng emaw zat awm nia pawh thil dik a ni tih sawiin, nikum lam Budget chu Congress kaihhruai sorkar-in a duan a ni a, tun \uma mi erawh chu MNF sorkar-in a duan a ni tih sawiin, an ngaih pawimawh zawng leh duh zawng inang lo tam tak a awm avangin a inang thei lo hrim hrim a ni, a ti.
