Inkharkhip pawhsei chungchang hi vawiin khan Treasury Square-a Assembly Annexe Conference Hall-ah ngaihtuah a ni a, hetah hian pawl hrang hrang aiawhte chuan tuna India dinhmun thlirin inkharkhip hi chhunzawm zel ni se tha an tih thu an sawi a. Tun dinhmunah Mizoram chu hri leng lakah fihlim angin lang rih mah se, engtik hunah pawh hri hi lo lut thei reng a nih avangin inkhuahkhirhna hnuaia awm chu mipui himna tur nia a lan thu an sawi a ni.
Puan tawh thin angin March ni 22-a Sorkar laipuiin ni khat chhung Curfew a puan tuk atang khan Mizoram chu vawiin thlengin khuahkhirhna hnuaiah a la awm chhunzawm zel a. Sorkar laipui duh danin, inkharkhip hi tum 3 pawhsei a ni tawh a, tuna inkharkhip kalpui mek hi Pathianni hian a tawp tawh dawn a, hemi hnuah hian Sorkar laipuiin inkharkhip hi a pawt sei leh dawn em tih hriat ni lo mah se, Mizoram bikah chuan pawhsei leh a ni dawn ta a. Rawtna chi hrang hrang awmte chu State Level Task Force in a en zui ang a, sorkar laipui atanga thupek thar awmte thlir telin, mipui kharpkhip chhunga inkaihhruai dan tur chu an duang dawn a ni.
Vawiina Inkharkhip chungchang sawi honaah hian Assembly Speaker, Pu Lalrinliana Sailo, Health Minister, Dr. R. Lalthangliana, Home Minister, Pu Lalchamliana, I&PR Minister, Pu Lalruatkima, Covid 19 Medical Operational Team Leader, Dr. ZR. Thiamsanga MLA leh Chief Secretary, Pu Lalnunmawia Chuaungo bakah Political Party, pawl hrang hrang leh Kohhran aiawhte an tel a ni.
