Pu Zoramthanga thubuai ngaihtuahnaah hian he thubuaia thuhretute pahnihna chu thu zawhfiah tura tih ni mah se, engemaw rokhawlhna avangin Court-ah a inlan thei lova, thubuai ngaihtuahtu Special Judge, Pu Thang Lianmang Guite chuan thubuai hi thla leh, August ni 14-a ngaihtuah chhunzawm turin a ti a ni.
He thubuaia Sorkar aiawha ding Public Prosecutor, Pu R. Lalremruata hnen a\anga Zonet thudawn danin, Pu Zoramthanga thubuai hi MNF sorkar hmasain kum 2008-a Mipui Intodelhna Project (MIP) a kalpuinaa Agriculture Department kaltlanga Mizoram Venus Bamboo Product Private Limited hnen Rs. nuai 50, Champhai leh Hnahlan Grape Grower Society hnena Rs. nuai 83 ve ve Loan hmanga pek an nih chungchang a ni a. MIP inkaihhruaina danin a sawi ang chuan MIP pawisa hi Loan hmanga pek chhuah theih a ni lova, hetiang a nih laia Loan hmanga sum \hahnem tak pekchhuah a nih chungchangah thubuai thehluh a ni a, Vigilance Department chuan kum 2009 khan Anti Corruption Bureau hnenah thubuai chhui phalna a pe a. Hemi ang hian ACB chuan thubuai hi chhuiin, kum 2013 January thla khan Court-ah thubuai chhuina Chargesheet a thehlut a ni.
Zawhna chhangin Sorkar Ukil, Public Prosecutor, Pu R. Lalremruata chuan, he thubuai hi MIP sum hman dik lohna chungchang a nih avangin Pu Zoramthanga chauh ni lo, khatih laia Agriculture Minister, Pu H. Rammawi leh Chief Minister Adviser, Pu Lalhuapzauva pawh thubuai siamsak an ni tih a sawi a. He thubuai chungchanga Sorkar lam insawifiahnaah chuan MIP sum hi Loan hmanga pek theih loh tih ni mah se, \anpuina Grant-in-Aid anga pek theih a ni thung a. He sum hi \anpuina ang chauha pek chhuah a nih chuan a dawngtuten hna an thawh \hat loh phah hlauhna avangin Loan anga sum hi pekchhuah niin sorkar lam chu a insawifiah a ni.
Court-in Chief Minister, Pu Zoramthanga thubuai a ngaihtuahnaah hian amah chu Court-a inlan lovin a aiawhinin Ukil, Pu W. Sam Joseph a inlan a ni.
