He lei hi NEDP sum Rs. 5,71,00,000/- sengin Galvanized Bailey Bridge-a dawh tur a ni a, a sei zawng hi feet 180, a zau zawng feet 9 leh inches 10 a ni ang a, motor leh a thil phurh tonne 24-a rit dawl zo tura dawh a ni ang. Lei dawh hna hi PWD-in a thawk dawn a ni. Dawh zawh a nih hun chuan Serchhip lam a\angin Thenzawl, Zote South leh Chhipphir lam panin awlsam zawkin a kal theih tawh dawn a, nitin khawsakna mamawh lakna bakah Mat leh Tuisen phairuama leilet nei hoten nasa takin an chhawr \angkai thei dawn a ni. Lungphumna inkhawma thusawiin, Pu Lal Thanhawla chuan Mizoramin a mamawh ang zelin sorkarin a policy a siam niin a sawi a, tun hmalama ram buai laiin remna leh muanna awm theihna turin policy siam a ni a, chumi hnuah mi retheite khai chhuah nan NLUP siam a ni a, chu hmalakna tichak tur leh belhchhah turin NEDP duan leh a ni a, chumi hmang chuan hmasawnna tur leh intodelhna tura hmalak niin a sawi a ni. Chief Minister chuan kawlphetha lama intodelhna turin ni zung chakna hmang chi Solar Energy Plant hmun engemawzatah kalpui niin a sawi bawk. Lei dawhna tur lung phumna inkhawm hi PWD Engineer-in-Chief, Pu R. Vanlaltluanga’n a kaihruai a, hetah hian Chief Engineer Roads, Pu R. Lalrintluanga pawhin thu a sawi a ni.
