Chief Minister, Pu Lal Thanhawla hova Sorkar mipawimawhte leh MZP hruaitute vawiina \hukhawmin Ramri chungchang chipchiar zawka zirchiangtu tur Committee an din.
He committee-ah hian Home Addl. Secretary, Pu Lalbiakzama chairman-na hnuaiah member atan mi 3, Chief Conservator of Forest, Pu Lalthlamuana Pachuau, Delhi Mizoram House-a Assistant Resident Commission, Pu David Lalthantluanga leh MZP President, L. Ramdinliana Renthlei ruat an ni a. An ni hian Mizoram ramri tichiang turin British-in India a awp laia India ram hmun hrang hranga thil awm dan chipchiar zawkin a zirchiang dawn a. Hei bakah hian tuna Mizoram Map hman mek, Constitutional Boundary chu a dik em tih Sorkar mipawimawh leh MZP hruaituten a hmunah an enfiah ang a, a zirchianna Report chu July thla ral hmain Chief Minister hnenah an thehlut dawn a ni. Meeting kaihruaitu Chief Minister, Pu Lal Thanhawla chuan, ramri chungchang chu eptu party a piangin Politics khelh nana hmang nia sawiin, inpuhmawh nan an hmang \hin niin a sawi a. Ramri chu inpuhmawhna chi a ni lo nia sawiin, Mizo zawng zawng hmakhua a nih avangin lungrual taka hmalak tlan a ngai tih a sawi a ni. Vawiina ramri chungchang sawi honaah hian Home Minister, Pu R. Lalzirliana, Home Secretary, Pu Lalnunmawia Chuaungo, Home Addl. Secretary, Pu Lalbiakzama, Chief Minister Principal Secretary, Pu Lalramthanga, Chief Conservator of Forest, Pu Lalthlamuana Pachuau, Kolasib DFO, Pu Lalnunzira bakah MZP President, L. Ramdinliana Renthlei leh Vice President, Vanlaltana an tel a ni.
An meeting zawha Zonet zawhna chhangin MZP president, L Ramdinliana Renthlei chuan, Bairabi Zophai hmuna MZP in Zofate chawlhbuk sak a tum chungchangah MZP chu a dinna ngaiah a la ding reng tih a sawi a. Vawiina Chief Minister hova ramri chungchang zirchiangtu tur Committee din a ni leh ramri enfiah tura hmalak chu an ngaichang phawt ang a, hei hian an duh ang hma a la lo a nih chuan a \il angin Zofate chawlhbuk chu sak chhunzawm an tum tih MZP President chuan a sawi.
