Chief Minister Pu Lal Thanhawla hova nimina Council of Ministers \hukhawm in tunhnaia ruahsur nasa avanga Mizoram hmun hrang hranga chhiatna leh harsatna thleng chu pawi an tih thu sawiin, harsatna tawk te an tuarpui thu te, District hrang hrang DC te chu anmahni district \heuha harsatna tawkte chhinchhiaha video record kimchang tak siama, DM&R Deptt.-a thehlut turin an hriattir a, harsatna tawk te chu a theih ang anga \anpui tur leh chhawmdawl turin an ngen nghal a ni. Home Minister, Pu R. Lalzirliana pawhin tun hnaia ruahsur nasa avanga Zoram hmun hrang hranga harsatna thleng tuartute \ha taka chhawmdawl an nih theih nan Police Officer te chu an hnathawhna hmun \heuha awm turin hriattir an ni tih a tarlang a, tun thla ni 14 leh 15-a Mizoram Police Service Association Conference neih tur pawh \hulh a ni tih a puang bawk a ni.
He Cabinet Meeting-ah hian tun thla ni 27-a Mizoram Assembly Session ni khat awh tur neih tur a nih thu te, he Session-ah hian Mizoram sorkar leh HPC(D) te inremna thuthlung anga Sinlung Hills Council dinna tur Bill ngaihtuah tum a nih thu te, sorkar laipuiin Citizenship Amendment Bill 2016 siam a tum duh loh lantirna tur Resolution pass tum a ni dawn a ni. Hemi chungchang sawihonaah hian Chief Minister, Pu Lal Thanhawla chuan Union Home Minister, Pu Rajnath Singh-a hnenah he Bill an duh loh thu hi ziakin a thlen tawh tih tarlan a ni.
